CINGIYM GŁODNO
Bejmy odłożóne w szkarpycie niewielgie,
Inflacjo nóm je żdżyro
I tak nos poniewiyro.
Coroz wiynkszo biyda sie hejbła.
Oby selera jedna chybko naziymbła.
Ceny niby zamrożóne,
A i tak oszukujóm nos ci óne.
Tytki mniejsze, towor mni woży
Wszycho na ich korzyś.
Gospodarka zaczła podupodać,
O lepszy sytuacji ciynżko tero godać.
Kredyty w góre cingiym ejbujóm,
Czy banki nasze bejmy tak nogle potrzebujóm?
Kiej skóńczy sie kredytów ejbowanie,
Cheba czkajóm na nasze wykitowanie.
Wtyncos skóńczy sie na nie zapotrzebowanie.
Ryszard Paluszak
W grudniu po południu 2022 r.